فلسطین تحریکِ  مزاحمت 'حماس 'نے امریکی صدر ڈونلڈ ٹرمپ کے غزہ منصوبے کے تحت  ہتھیار ڈالنے پر رضامندی سے متعلق خبروں  کی تردید کی ہے۔

حماس کے سینئر رکن محمود مرداوی نے ایک بیان میں کہا ہے کہ"ہم ، فائر بندی مذاکرات کی رَوِش اور ہتھیار ڈالنے کے موضوع پر حماس کے موقف سے متعلق، بعض ذرائع ابلاغ کے شائع کردہ دعووں کی سختی سے تردید کرتے ہیں"۔

انہوں نے کہا ہے کہ "ایسی خبریں بے بنیاد ہیں۔ ان کا مقصد حماس کے مؤقف کو مسخ کرنا اور  رائے عامہ کو گمراہ کرنا ہے"۔

مرداوی نے میڈیا اداروں سے، معلومات کی تصدیق کرنے اور معتبر ذرائع پر انحصار کرنے کی، اپیل کی  اور صحافیوں سے کہا  ہےکہ وہ افواہوں یا غیر مصدّقہ دعووں کا شکار نہ بنیں۔

واضح رہے کہ ذرائع ابلاغ کی خبروں  میں پہلے کہا گیا تھا کہ حماس نے بین الاقوامی نگرانی کے تحت اپنے ہتھیار ایک فلسطینی۔مصری کمیٹی کے حوالے کرنے پر اتفاق کر لیا ہے۔

مصر ،پیر کے روز، ٹرمپ کے غزہ منصوبے کے تحت قیدیوں کے تبادلے کے معاہدے کی تفصیلات پر بات چیت کے لئے حماس اور اسرائیل کے مذاکراتی وفود کی میزبانی کرے گا ۔

29 ستمبر کو امریکہ کے صدر ڈونلڈ ٹرمپ نے 20 نکاتی منصوبہ پیش کیا تھا۔ یہ منصوبہ، اسرائیلی قیدیوں اور فلسطینی قیدیوں کی رہائی، جنگ بندی، حماس کو غیر مسلح کرنے اور غزہ کی تعمیر نو پر مشتمل ہے۔

حماس نے اصولی طور پر اس منصوبے پر اتفاق کیا ہے اور اگلے اقدامات پر بات چیت کے لئے  مصر مذاکرات کی حامی بھری ہے۔

اسرائیل ، اکتوبر 2023 سے اب تک  محصور غزہ میں، زیادہ تر عورتوں اور بچوں پر مشتمل،  67,000 سے زائد فلسطینیوں کو قتل کر چُکا ہے ۔

اسرائیل، انسانی قتل عام کے ساتھ ساتھ ماحولیاتی قتل عام بھی نہایت بے شعوری کے ساتھ جاری رکھے ہوئے ہے۔ بھاری دھماکہ خیز مواد کے ساتھ   علاقے کی آبادیاتی ساخت کے  بیشتر حصے کو تباہ کر چُکا  اور عملی طور پر تمام آبادی کو بے گھر کر چُکا ہے۔