پولیس اور مقامی ذرائع ابلاغ نے اطلاع دی ہے کہ شمال مغربی پاکستان میں جمعہ کی شام ایک تقریبِ شادی میں دھماکے سے کم از کم پانچ افراد ہلاک اور متعدد زخمی ہو گئے ۔
جیو نیوز کے مطابق جب مہمان تقریب ِ عروسی کے لیے جمع تھے، یہ دھماکہ خیبر پختونخوا کے ضلع ڈیرہ اسماعیل خان میں حکومت نواز 'امن ملیشیا' کے رہنما نور عالم محسود کے گھر پر ہوا۔
پولیس نے کہا کہ تفتیش کار ابھی دھماکے کی صحیح نوعیت معلوم کرنے کی کوشش کر رہے ہیں، مگر ابتدائی شواہد اس بات کی طرف اشارہ کرتے ہیں کہ یہ خودکش بم حملہ تھا۔ کسی گروہ نے فوری طور پر اس کی ذمہ داری قبول نہیں کی۔
سیکیورٹی افواج نے علاقے کو گھیرے میں لے کر تفتیش شروع کر دی جبکہ زخمیوں کو قریبی ہسپتالوں میں منتقل کیا گیا۔ عہدیداروں نے ان کی حالت کے بارے میں فوری طور پر تفصیلات جاری نہیں کیں۔
یہ حملہ خیبر پختونخوا میں جاری سیکیورٹی کے چیلنجز کو نمایاں کرتا ہے۔
یہ علاقہ افغان سرحدوں سےمتصل ہے اور یہاں پر عموماً سیکیورٹی اہلکاروں اور حکومت نواز شخصیات کو نشانہ بنے والے عسکریت پسندانہ حملوں میں اضافہ دیکھا جا رہا ہے۔
