روسی نجی فوجی کمپنی ویگنر نے مالی سے اپنی واپسی کا اعلان کیا ہے، جس کے ساتھ ہی مغربی افریقی ملک میں تین سال سے زیادہ عرصے پر محیط آپریشنز کا اختتام ہو گیا ہے۔

جمعہ کے روز گروپ نے کہا، "ہم نے مقامی محب وطنوں کی مدد کی تاکہ ایک مضبوط اور منظم فوج تشکیل دی جا سکے جو اپنی زمین کا دفاع کر سکے۔ تمام علاقائی دارالحکومتیں جائز حکام کے کنٹرول میں واپس آ چکی ہیں۔"

گروپ نے دعویٰ کیا، "ہم نے ہزاروں جنگجوؤں اور ان کے کمانڈرز کو ہلاک کیا ہے جو کئی سالوں سے شہریوں کو دہشت زدہ کر رہے تھے۔"

مالی، جو ساحل کے علاقے میں واقع ہے، 2012 سے شورش زدہ  ہے۔ملک کی فوجی حکومت نے فرانس اور دیگر شراکت داروں سے تعلقات ختم کرنے کے بعد روس سے مدد طلب کی۔

رپورٹس کے مطابق، ویگنر کے اعلان کے باوجود، روس مغربی افریقی ملک میں اپنی موجودگی برقرار رکھے گا، اور اس کی ریاستی کنٹرول شدہ نیم فوجی فورس، افریقہ کور، وہاں کام کرے گی۔

اس سال کے اوائل میں، مالی، برکینا فاسو اور نائجر، جو تینوں فوجی حکومت کے تحت ہیں، نے مغربی افریقی علاقائی بلاک ایکو واس کو باضابطہ طور پر چھوڑ دیا۔

انہوں نے اپنا ایک نیا بلاک تشکیل دیا ہے جسے ساحل ریاستوں کا اتحاد کہا جاتا ہے۔