امریکی صدر ڈونلڈ ٹرمپ نے کہا کہ امریکہ بہت جلد وینزویلا کے مشتبہ منشیات فروشوں کو روکنے کے لی زمینی  کارروائی شروع کرے گا۔

 ٹرمپ نے امریکی فوجی اہلکاروں سے ورچوئل گفتگو کرتے ہوئے کہا کہ آپ نے شاید نوٹ کیا ہوگا کہ لوگ سمندر کے راستے اسمگلنگ  نہیں کرنا چاہتے،ہم انہیں خشکی سے بھی روکنا شروع کر دیں گے جس کےلیے  آپریشن  بہت جلد شروع ہونے والا ہے۔

وینزویلا کی  وزارت اطلاعات  نے فوری طور پر اس بیان  کا جواب نہیں دیا۔

ٹرمپ انتظامیہ وینزویلا سے متعلق آپشنز پر غور کر رہی ہے تاکہ صدر نکولس مادورو کے غیر قانونی منشیات فراہم کرنے کے کردار کا مقابلہ کیا جا سکے ۔

  واضح رہے کہ مادورو نے غیر قانونی منشیات کی تجارت سے کسی بھی تعلق کی تردید کی ہے۔

امریکی فوجیوں نے ستمبر سے اب تک کیریبین اور پیسفک میں مبینہ منشیات کی کشتیوں پر کم از کم 21 حملے کیے ہیں جن میں کم از کم 83 افراد ہلاک ہوئے ہیں۔

حالیہ ہفتوں میں امریکی فوج نے وینزویلا کے ساتھ تعلقات خراب کرتے  ہوئے کیریبین میں اپنی فوجیں تعینات کر دی ہیں۔

رائٹرز نے چار امریکی حکام کے حوالے سے بتایا ہے  کہ امریکہ وینزویلا سے متعلق آپریشنز کے نئے مرحلے کا آغاز کرنے کے لیے تیار ہے۔