پاکستان نے کہا ہے کہ بھارت نے دریائے چناب کا رُخ تبدیل کر دیا ہے۔
منگل کے روزجاری کردہ بیان میں اسلام آباد نے کہا ہے کہ دریاوں کے بہاو میں مداخلت کو "اعلانِ جنگ" سمجھا جائے گا ۔ صوبہ پنجاب کے وزیرِ آبپاشی کاظم پیرزادہ نے اے ایف پی کے لئے جاری کردہ بیان میں کہا ہے کہ " ہم نے دریائے چناب کے بہاو میں غیر قدرتی تبدیلیوں کا مشاہدہ کیا ہے"۔
واضح رہے کہ دریائے چناب، بھارت سے شروع ہوتا ہے اور ان تین دریاؤں میں شامل ہے جو 1960 کے سندھ طاس معاہدے کے تحت پاکستان کے کنٹرول میں دیے گئے تھے ۔بھارت نے 22 اپریل کو مقبوضہ کشمیر کے علاقے پہلگام میں مسلح حملے کے بعد سندھ طاس معاہدہ منسوخ کر دیا تھا۔
پاکستان کا، بھارت کے ساتھ، سرحدی صوبہ 'پنجاب' پاکستان کے 24 کروڑ شہریوں میں سے تقریباً نصف کا گھر اور ملک کا زرعی مرکز ہے۔ کاظم پیرزادہ نے خبردار کیا ہے کہ "زیادہ تر اثر ان علاقوں پر پڑے گا جہاں متبادل پانی کے ذرائع کم ہیں"۔ انہوں نے مزید کہا ہے کہ "ایک دن دریا کا بہاؤ معمول پر تھا اور اگلے دن یہ بہت کم ہو گیا"۔
پاکستان کے سابقہ وزیرِ ماحولیات کی زیرِ قیادت تھنک ٹینک "جناح انسٹیٹیوٹ" کے مطابق بھارت سے 26 اپریل کو بھاری مقدار میں پانی آزاد کشمیر کی طرف چھوڑ دیا تھا۔
پیرزادہ نے مزید کہا ہے کہ "یہ اس لیے کیا جا رہا ہے تاکہ ہم اس پانی کو استعمال نہ کر سکیں"۔
ایک سینئر بھارتی اہلکار نے دی انڈین ایکسپریس کو بتایا ہےکہ بھارت کے زیر انتظام کشمیر میں اور پاکستانی پنجاب کے بالائی حصّے میں واقع بگلیہار ڈیم کے دروازے، پانی کے بہاؤ کو محدود کرنے کے لیے، گِرا دیئے گئے ہیں۔ ایسا ایک قلیل المدتی تادیبی اقدام کے طور پر کیا گیا ہے۔
سندھ طاس معاہدہ بھارت کو مشترکہ دریاؤں کے پانی کو بیراجوں یا آبپاشی کے لیے استعمال کرنے کی اجازت دیتا ہے لیکن پانی کے بہاؤ کو موڑنے یا نیچے کے بہاؤ میں تبدیل کرنے سے منع کرتا ہے۔
بھارتی حکام نے ابھی تک کوئی تبصرہ نہیں کیا لیکن بھارت کے سنٹرل واٹر کمیشن کے سابق سربراہ کوشویندر ووہرا نے دی ٹائمز آف انڈیا کو بتایا ہے کہ " معاہدہ معطل ہونے کی وجہ سے ہم کسی بھی منصوبے پر بغیر کسی پابندی کے پانی چھوڑ سکتے ہیں"۔
ماہرین کا کہنا ہے کہ پانی کو لمبے عرصے کے لئے اور مکمل طور پر نہیں روکا جا سکتا۔ بھارت صرف پانی کے بہاؤ کے وقت کو کنٹرول کر سکتا ہے۔ تاہم، جِناح انسٹیٹیوٹ نے خبردار کیا ہےکہ "پانی چھوڑنے کے وقت میں معمولی تبدیلیاں بھی بوائی کے کیلنڈر کو متاثر کر سکتی ہیں اور فصل کی پیداوار کو کم کر سکتی ہیں"۔
