تھائی لینڈ کی وزیر اعظم پیتونگ تارن شناوترا بدھ کے روز پارلیمان میں عدم اعتماد کے ووٹ سے بچ گئیں اور انہوں نے حزب اختلاف کی جماعتوں کے چیلنج کو شکست دے دی جنہوں نے ان پر اپنے والد اور ارب پتی سابق وزیر اعظم تھاکسن شناوترا کی کٹھ پتلی ہونے کا الزام عائد کیا تھا۔

دو روز تک جاری رہنے والی مذمتی بحث کے بعد، جس میں حزب اختلاف نے 38 سالہ پیتونگٹرن کے ملک کے انتظام اور ان کی ناتجربہ کاری پر تنقید کی، ارکان پارلیمنٹ نے تحریک عدم اعتماد کو 162 کے مقابلے میں 319 ووٹوں سے مسترد کر دیا۔

ووٹ جیتنے کے بعد پیٹنگٹرن نے اپنے حامیوں کا شکریہ ادا کیا۔

انہوں نے فیس بک پر لکھا کہ 'حق میں اور مخالفت دونوں طرح کے تمام ووٹ مجھے اور کابینہ کو عوام کے لیے سخت محنت جاری رکھنے پر مجبور کریں گے۔'

جدید تھائی تاریخ کے سب سے بااثر لیکن متنازع سیاستدان تھاکسن 15 سال کی خود ساختہ جلاوطنی کے بعد 2023 میں مملکت واپس آئے تھے۔

 انہوں نے تاریخی بدعنوانی اور اختیارات کے ناجائز استعمال کے الزام میں آٹھ سال قید کی سزا کے چند ماہ ایک پولیس اسپتال میں گزارے تھے جس کے بعد بادشاہ نے انہیں معاف کر دیا تھا، جس کے بعد ان کے ساتھ نرمی سے برتاؤ کرنے کے لیے بیک روم ڈیل کی افواہوں کو ہوا ملی تھی۔

شیطانی  معاہدہ

گزشتہ سال پیتونگٹرن فیو تھائی پارٹی کی زیر قیادت مخلوط حکومت کے سربراہ کے طور پر وزیر اعظم بنے تھے، جو تھاکسن کی قائم کردہ سیاسی تحریک کی تازہ ترین شکل ہے۔

مذمتی بحث کے دوران حزب اختلاف کی اہم جماعت پیپلز پارٹی سے تعلق رکھنے والے قانون ساز رنگسیمن روم نے پیتونگٹرن پر الزام عائد کیا کہ وہ اپنے والد کے ساتھ ترجیحی سلوک کر رہے ہیں۔

انہوں نے پارلیمان میں کہا کہ آپ نے اپنے والد کو دوسرے قیدیوں کے مقابلے میں بہتر حالات فراہم کرنے کے لیے ایک  سمجھوتہ کیا تھا اور شرط یہ تھی کہ آپ کے والد ایک دن بھی جیل میں نہیں رہیں گے۔

پیتونگٹرن نے ان الزامات کی تردید کرتے ہوئے کہا کہ وہ اپنے والد کی شاہی معافی کے چند ماہ بعد ہی وزیر اعظم بنیں۔