ترک پارلیمانی اسپیکر نُعمان قرتلمش نے کہا ہے کہ شام کی علاقائی سالمیت اور قومی خودمختاری     ایک ناقابل بحث معاملہ  ہے  ۔

سوشل میڈیا پر شائع ایک بیان میں انہوں نے کہا کہ ایک شمولیتی نظام، تمام گروپوں کی منصفانہ نمائندگی اور ایک جمہوری شام "علاقے کی ضمانت" ہوگی ۔

قرتلمش کے مطابق، ترکیہ شام کے انضمامی عمل میں اٹھائے جانے والے اقدامات کو قریب سے دیکھ رہا ہے اور ان کی قدر کرتا ہے۔

انہوں نے مزید کہا کہ 10 مارچ 2025 کو شامی حکومت اور YPG نامی دہشت گرد گروپ کے درمیان دستخط شدہ مفاہمتی یادداشت اور 30 جنوری کے معاہدے کی شقوں کی مکمل پابندی شام میں امن اور خطے میں استحکام لائے گی۔

انہوں نے کہا، "جیسے جیسے عہد و پیمان نافذ ہوں گے، حقیقی امن حاصل ہوگا۔"

معاہدے کے فوجی اور انتظامی انضمام کو ایک بڑا موقع قرار دیتے ہوئے انہوں نے کہا کہ یہ شام کی ریاستی صلاحیت کو مضبوط کر سکتا ہے اور ایک نئے سکیورٹی ڈھانچے کے دروازے کھول سکتا ہے۔

انہوں نے زور دیا کہ کسی شناخت یا عقیدے کو خارج نہیں کیا جانا چاہیے اور ہر شامی شہری کو سیاسی نظام میں "عزت اور تحفظ" کی جگہ ملنی چاہیے۔

انہوں نے کہا، شام شامیوں کا ہے،ترکیہ یکجہتی اور تعمیرِ نو کی حمایت جاری رکھے گا اور اداروں کی دوبارہ تعمیر، سرحدی سلامتی اور انسدادِ دہشت گردی کے لیے ہر قسم کی مدد فراہم کرنے کے لئے تیار ہے۔