ترکیہ کے صدر رجب طیب اردوعان نے صومالیہ کے صدر حسن شیخ محمود سے ملاقات میں دو طرفہ تعلقات اور علاقائی و عالمی امور پر تبادلۂ خیال کیا ہے۔
ملاقات کل بروز جمعرات استنبول کے دولماباہچے صدارتی دفتر میں طے پائی۔
ترکیہ صدارتی محکمہ اطلاعات نے ترکیہ کے سوشل میڈیا پلیٹ فارم NSosyal سے ملاقات سے متعلق بیان جاری کیاہے ۔
بیان کے مطابق صدر اردوعان نے کہا ہے کہ انقرہ ،صومالیہ کے ساتھ باہمی تعلقات کو متعدد شعبوں اور خاص طور پر تجارت اور توانائی کے شعبوں میں آگے بڑھانے کے لیے اقدامات جاری رکھے گا۔
انہوں نے مزید کہا ہے کہ ترکیہ کے 'چاعری بے' ڈرلنگ بحری جہاز کا صومالیہ کے ساحل کے قریب آپریشن شروع کرنا دونوں ممالک کے درمیان بڑھتے ہوئے تعاون کی علامت ہے۔
صدر رجب طیب اردوعان نے صومالیہ کی خودمختاری اور علاقائی سالمیت کے ساتھ ترکیہ کی حمایت کا بھی اعادہ کیا اور کہا ہے کہ انقرہ ،صومالیہ اور ایتھوپیا کے درمیان تنازعات کے مکمل حل کی کوششوں کی حمایت جاری رکھے گا۔
ملاقات میں وزیرِ توانائی و قدرتی وسائل آلپ ارسلان بائراکتار ، قومی انٹیلی جنس ادارے کے سربراہ ابراہیم قالن، صدارتی محکمہ مواصلات کے سربراہ برہان الدین دوران ، خارجہ پالیسی و سلامتی کےمشیرعاکف چغتائے قلچ اور مشیر اعلیٰ ظفر چوبکچو نے بھی شرکت کی۔
