لبنان نے کہا ہے کہ حزبِ اللہ کو غیر مسلح کرنے سے متعلقہ منصوبے کے دوسرے مرحلے کے نفاذ  کے لیے فوج کو کم از کم چار ماہ درکار ہوں گے۔

گذشتہ سال لبنان  حکومت نے حزبِ اللہ کو غیر مسلح کرنے کا عزم ظاہر کیا اور اس مقصد کے لیے فوج کو ایک منصوبہ تیار کرنے کی ذمہ داری سونپی تھی۔

گذشتہ ماہ  جاری کردہ بیان میں فوج نے کہا تھا کہ منصوبے کا پہلا مرحلہ مکمل کر لیا  گیاہے۔ یہ مرحلہ ، دریائے لیتانی اور اسرائیلی سرحد کے درمیان  اور بیروت سے تقریباً ً 30 کلومیٹر جنوب  کی طرف واقع علاقے  کا احاطہ کرتا ہے۔

دوسرا مرحلہ لیتانی اور اوالی دریا وں کے درمیانی اور بیروت کے جنوب میں تقریباً 40 کلومیٹر فاصلے پر واقع علاقے سے متعلق ہے ۔

وزیرِ اطلاعات پال مورکوس نے کابینہ اجلاس کے بعد ایک نیوز کانفرنس میں کہا ہے کہ حکومت  منصوبے کے دوسرے مرحلے پر "فوجی قیادت کی پیشکش پر غور کر رہی ہے"۔

انہوں نے کہا  ہے کہ "چار ماہ کا وقت طے کیا گیا  ہے تاہم اس مہلت کو  دستیاب صلاحیتوں، اسرائیلی حملوں اور زمینی رکاوٹوں کے پیشِ نظر بڑھایا جا سکتا ہے ۔

واضح رہے کہ اسرائیل،لبنان۔اسرائیل جنگ کے خاتمے کے لئے  نومبر 2024 میں طے پانے والی جنگ بندی کے باوجود، باقاعدگی سے لبنان پر حملے کر رہا ہے۔

اسرائیل نے  لبنان کے پانچ جنوبی علاقوں میں بھی اپنی فوجیں بدستور متعین رکھی ہوئی ہیں اور اس تعیناتی کو  وہ اسٹریٹجک قرار دیتا ہے۔

لبنان محکمۂ صحت نے کہا  ہےکہ کل بروز سوموار ملک کے جنوب میں  اسرائیلی حملوں میں دو افراد ہلاک ہو گئے ہیں۔