ہسپانوی وزیر اعظم پیڈرو سانچیز نے فلسطین کے صدر محمود عباس سے ملاقات کے دوران بین الاقوامی برادری سے مطالبہ کیا ہے کہ وہ فلسطینیوں کی حالت زار  پر اپنی آواز بلند کرے۔

انسانی حقوق کے دن لا مونکلوا پیلس میں خطاب کرتے ہوئے سانچیز نے اس موقع کو علامتی قرار دیا، عالمی اعلامیہ برائے انسانی حقوق کی سالگرہ کا ذکر کیا اور زور دیا کہ انسانی وقار ایک غیر مشروط اور  منفرد  قدر ہے۔

سانچیز نے میڈرڈ کے دو ریاستی حل کی حمایت کو بھی دہرایا اور اسے اسرائیلی-فلسطینی تنازعے کا "واحد ممکنہ حل" قرار دیا۔

انہوں نے زور دیا کہ اسرائیل کی غزہ جنگ میں حالیہ جنگ بندی حقیقی ہونی چاہیے، "فرضی" نہیں،اور اصرار کیا کہ شہریوں پر حملے ختم ہونے چاہئیں۔

 سانچیز نے کہا کہ سال 2025 فلسطینی عوام کے لیے خوفناک رہا ہے، غزہ میں دس میں سے نو گھر اب رہنے کے قابل نہیں اور ہزاروں جانیں اور خاندان تباہ ہو چکے ہیں۔

انہوں نے خبردار کیا کہ جنگ بندی نے شہریوں کی تکلیف کا خاتمہ نہیں کیا۔ جنگ بندی کے بعد بھی غزہ میں فلسطینی اب بھی حملوں کا شکار ہیں، ہمارا مطالبہ ہے کہ  حقیقی امن انصاف پر مبنی ہونا چاہیے۔

انہوں نے کہا کہ  اس نسل کشی کے ذمہ دار افراد کو جلد یا بدیر جوابدہ  ضرور ٹھہرایا جائے گا۔

سانچیز نے نتیجہ اخذ کیا کہ اسپین اور فلسطین "ہمیشہ ہاتھ میں ہاتھ ڈالے چلتے رہیں گے،" اور امید ظاہر کی کہ عباس کا دورہ بین الاقوامی قانون کے دائرے میں حل تلاش کرنے اور ممالک کے درمیان تعلقات کو مضبوط بنانے میں مدد دے گا۔

عباس نے مئی 2024 میں ریاست فلسطین کو تسلیم کرنے پر اسپین کا شکریہ ادا کیا اور میڈرڈ کی قیادت کی تعریف کی کہ انہوں نے بین الاقوامی اتحاد قائم کیا ہے۔

 انہوں نے غزہ اور مقبوضہ مغربی کنارے میں تشدد کے خاتمے کا بھی مطالبہ کیا۔

اسرائیلی فورسز نے اکتوبر 2023 سے اب تک 70,000 سے زائد افراد کو ہلاک کیا ہے، جن میں زیادہ تر خواتین اور بچے شامل ہیں،اور تقریبا 171,000  زخمی ہوئے ہیں۔

غزہ کے سرکاری میڈیا آفس کے مطابق، جنگ بندی کے بعد سے اسرائیلی فوج کی فائرنگ سے کم از کم 386 افراد ہلاک اور 980 زخمی ہوئے ہیں۔