2012میں خلاء کی سرحد سے کیے گئے ریکارڈ فری ڈائیونگ کی بدولت شہرہ آفاق ایکسٹریم کھیلوں کے پیش رو فیلکس بومگارٹنر جمعرات کو اٹلی کے وسطی حصے میں پیراگلائیڈنگ حادثے میں جاں بحق ہو گئے۔ بومگارٹنر 56 سال کے تھے۔
مقامی پولیس نے بتایا کہ بومگارٹنر اٹلی کے مارچے علاقے کے پورتو سینٹ ایلپیدیو کے اوپر اڑتے ہوئے اپنے موٹرائزڈ پیراگلائیڈر کو قابو نہ رکھ سکے اور زمین پر گر پڑے۔ وہ ایک ہوٹل کے سوئمنگ پول کے قریب زمین پر جا گرے۔ حادثے کی وجہ تا حال واضح نہیں ہو سکی۔
پورتو سانٹ ایلپیدیو کے میئر ماسمیلیانو چیاربلا نے کہا کہ رپورٹوں میں بتایا گیا ہے کہ بومگارٹنر کو ہوا میں اچانک کوئی صحت کا مسئلہ درپیش آیا ہو سکتا ہے۔ انہوں نے بومگارٹنر کو "ایکسٹریم فلائٹس کی ہمت اور جذبے کی علامت" قرار دیتے ہوئے ان کی وفات پر پورے قصبے کی طرف سے تعزیت کا اظہار کیا۔
صوتی دیوار کو توڑنے والا پہلا پیراشوٹ باز
بومگارٹنر نے اکتوبر 2012 میں خصوصی طور پر ڈیزائن کیے گئے لباس میں سطح زمین سے 38 کلومیٹر کی بلندی سے ایک غبارے سے چھلانگ لگا کر صوتی دیوار کو عبور کرنے والے پہلا پیراشوٹ باز بن کر دنیا بھر کی خبروں کی زینت بن گئے۔ یہ تاریخی چھلانگ 14 اکتوبر 1947 کو امریکی لیجنڈری پائلٹ چک یگر کی طرف سے صوتی دیوار کو عبور کرنے والی پرواز کے 65ویں سال پر نیو میکسیکو کے روزویل شہر کے اوپر کی گئی تھی۔
چھلانگ کے دوران، بومگارٹنر نے 1,343 کلومیٹر فی گھنٹہ سے زیادہ کی رفتار پکڑی ۔ انہوں نے کم عمری میں پیراشوٹ کے ساتھ چھلانگ لگانا شروع کیا، اور بعد میں BASE جمپنگ (اونچی عمارتوں یا جگہوں سے پیراشوٹ کے ذریعے چھلانگ لگانا) جیسے ایکسٹریم کھیلوں میں دلچسپی لی۔
اپنے طویل کیریئر کے دوران، بومگارٹنر نے انگلش چینل کو پیراشوٹ کے ذریعے عبور کرنا اور ملیشیا میں پیٹروناس ٹاورز سے چھلانگ لگانے جیسی متعدد بہادرانہ ڈائیو لگائیں۔
