کمبوڈیا کا دعویٰ ہے کہ تھائی لینڈ نے پریاہ ویہیر صوبے میں ایف-16 جنگی طیاروں کے ساتھ نئی فضائی کارروائیاں کی ہیں۔

مقامی میڈیا آؤٹ لیٹ 'فریش نیوز' کے مطابق جمعرات کی صبح تھائی جیٹس نے پنوم کموچ اور پیک اسبیک کے علاقوں پر بمباری کی۔

ملک کی وزارت دفاع نے رپورٹ کیا ہے کہ کمبوڈیائی فورسز زمینی سالمیت اور قومی وقار کا تحفظ پختہ عزم کے ساتھ جاری رکھیں گی۔

تھائی مقامی نیوز ویب سائٹ 'دی نیشن' کے مطابق 7 دسمبر کو تنازعہ کے دوبارہ شروع ہونے کے بعد سے بین الاقوامی فراڈ نیٹ ورکس کے استعمال ہونے والی چھ سے زائد عمارتیں، جن میں کیسینو اور ہوٹل شامل ہیں، تباہ کر دی گئی ہیں۔

کمبوڈیائی میڈیا نے گزشتہ رات سرحدوں پر حالات معمول پر ہونے کی اطلاع دی تھی۔

خصوصی چینی ایلچی برائے ایشیا امور جمعرات کو 'دونوں فریقین کے درمیان پُل بننے اور جلد امن بحال کرنے کی کوشش' کے تحت کمبوڈیا اور تھائی لینڈ کا سفارتی دورہ کرے گا۔

یہ جھڑپیں 12 دن پہلے شروع ہوئی تھیں جن میں دونوں فریقین کے کم از کم 55 افراد ہلاک ہو چکے ہیں۔

تھائی حکام کے مطابق 21 تھائی فوجی اور 16 تھائی شہری ہلاک ہو چکے ہیں۔ کمبوڈیا کی وزارت داخلہ نے کہا کہ 18 کمبوڈیائی شہری ہلاک اور 78 زخمی ہوئے ہیں۔

یہ جھڑپیں اس کے باوجود جاری رہیں کہ امریکی صدر ڈونلڈ ٹرمپ نے جمعہ کو کہا تھا کہ تھائی لینڈ اور کمبوڈیا کے رہنماؤں نے دوبارہ شروع ہونے والی لڑائی روکنے پر اتفاق کیا ہے۔

دونوں ممالک نے اکتوبر میں کوالالمپور میں ٹرمپ اور ملیشیائی وزیر اعظم انور ابراہیم کی موجودگی میں ایک امن معاہدے پر دستخط کیے تھے، مگر بعد ازاں ایک سرحدی صوبے میں زمینی مائن کے دھماکے میں تھائی فوجیوں کے شدید زخمی ہونے کے بعد اس معاہدے کو معطل کر دیا گیا۔

تھائی حکام نے یہ بھی کہا کہ گزشتہ پانچ ماہ کے واقعات کے بعد تقریباً 18 کمبوڈیائی فوجی تھائی حراست میں ہیں۔

تھائی لینڈ اور کمبوڈیا کے درمیان سرحدی تنازعہ طویل عرصے سے چل رہا ہے جو بار بار تشدد کی صورت اختیار کرتا رہا ہے، جن میں جولائی کی جھڑپیں شامل ہیں جن میں کم از کم 48 افراد ہلاک ہوئے تھے۔