پاکستان کے وزیر اعظم شہباز شریف نے بھارت کو خبردار کرتے ہوئے واضح کیا ہے کہ دریائے سندھ کے پانی کا ایک ایک قطرہ پاکستان کے لیے 'سرخ لکیر' ہے۔
انہوں نے زور دیا کہ اسلام آباد امن کا خواہاں ہے، لیکن اپنی خودمختاری یا دفاع کے خلاف کسی بھی خطرے کا بھرپور جواب دیا جائے گا۔
شریف نے جمعرات کے روز دارالحکومت اسلام آباد میں پاکستان کے 80ویں یومِ آزادی کی شام پر 'یادگارِ فتح' کی افتتاحی تقریب سے خطاب کرتے ہوئے کہا کہ پاکستان کی امن کی خواہش کو کمزوری نہ سمجھا جائے۔
انہوں نے کہا کہ 'پاکستان جنگ نہیں بلکہ امن چاہتا ہے؛ امن کی تلاش کو کمزوری کی علامت نہیں سمجھا جانا چاہیے۔'
شریف نے بھارت کی جانب سے سندھ طاس معاہدے کو یکطرفہ طور پر معطل کرنے پر کڑی تنقید کی اور کہا کہ نئی دہلی نے یہ قدم مئی میں اپنی 'شکست' کے بعد اٹھایا ہے۔
ہیگ میں قائم مستقل عدالتِ ثالثی نے جون 2025 میں جاری کردہ اپنی رائے میں بتایا تھا کہ سالہا سال پرانے پانی کی تقسیم کے اس معاہدے میں یکطرفہ معطلی یا 'غیر معینہ مدت کے لیے چھوڑنےکی کوئی گنجائش نہیں ہے اور عدالت سندھ طاس معاہدے کے تحت پیدا ہونے والے تنازعات پر فیصلہ کرنے کا اختیار رکھتی ہے۔
سندھ طاس معاہدے کے تحت دونوں ممالک کے درمیان سندھ طاس کے چھ دریاؤں کو تقسیم کیا گیا تھا۔ بھارت کو تین مشرقی دریا — ستلج، بیاس اور راوی — دیے گئے جبکہ پاکستان کو تین مغربی دریاؤں — سندھ، جہلم اور چناب — پر کنٹرول ملا۔
پاکستان کا موقف ہے کہ بھارت کی جانب سے منصوبہ بند پن بجلی (ہائیڈرو الیکٹرک) ڈیم ان دریاؤں میں پانی کے بہاؤ کو روک دیں گے، جو کہ پاکستان کی 80 فیصد سیراب زراعت کی ضرورت پوری کرتے ہیں۔
یہ معاہدہ اپریل 2025 میں اس وقت شدید تناؤ کا شکار ہوا جب بھارت کے زیرِ انتظام کشمیر میں 26 ہندو سیاحوں کی ہلاکت کے بعد بھارت نے اس معاہدے میں اپنی شرکت معطل کر دی۔
نئی دہلی نے بغیر کوئی ثبوت فراہم کیے فوری طور پر پاکستان کو اس حملے کا ذمہ دار ٹھہرایا۔ دوسری طرف اسلام آباد نے اس الزام کو یکسر مسترد کرتے ہوئے ایک آزادانہ تحقیقات کا مطالبہ کیا۔
وزیر اعظم شہباز شریف نے گلگت بلتستان اور پاکستان کے زیرِ انتظام کشمیر (آزاد جموں و کشمیر) سمیت پاکستان کے تمام صوبوں کے اتحاد اور ترقی پر زور دیا۔
انہوں نے کہا، 'ہمیں ایک ایسا پاکستان بنانا ہے جہاں گلگت بلتستان اور آزاد جموں و کشمیر سمیت تمام صوبے مل کر آگے بڑھیں اور ترقی کریں۔'
انہوں نے مزید کہا کہ پاکستان مظلوم فلسطینیوں کے حقوق کی وکالت جاری رکھے گا اور ان کے حقِ خودارادیت کی حمایت کرتا رہے گا۔
