جاپان میں، حیوانات سے پھیلنے والے مہلک "کریمین ہیمرجک کانگو بخار" یعنی 'CCHF' وائرس کے نتیجے میں ایک ویٹرنر کی موت کے بعد ، وائرس کے ملک بھر میں پھیلنے کا اندیشہ محسوس کیا جا رہا ہے۔
ساوتھ مارننگ چائنہ پوسٹ کے مطابق ایک 50 سالہ ویٹرنر کی موت کے بعد تشویش محسوس کی جا رہی ہے کہ کہیں 'سی سی ایچ ایف' وائرس پورے ملک میں نہ پھیل جائے۔یہ وائرس جانوروں سے انسانوں میں منتقل ہوتا ہے اور اس کی علامات میں شدید بخار، سر درد، پٹھوں میں کھچاو، قے، اسہال اور جلد پر رِستے ہوئے زخم ظاہر ہونا شامل ہیں۔
اخبار کے مطابق متاثرہ وٹیرنر ایک بیمار بلی کا علاج کرنے کے بعد بخار میں مبتلا ہو گیاتھا۔ اسی دن اسے اسپتال میں داخل کیا گیا لیکن چند دنوں میں ہی اس کا انتقال ہو گیا۔ ڈاکٹر کے پوسٹ مارٹم میں کسی حیوانی جُوں یا چچڑی کے کاٹنے کے نشانات نہیں ملےاور نہ ہی اس کے ساتھیوں یا بلی کے مالک نے کسی قسم کی علامات کی اطلاع دی ہے۔
واضح رہے کہ 'سی سی ایچ ایف' ایک متعدی بیماری ہے جو بنیادی طور پر متاثرہ چچڑی کے کاٹنے سے پھیلنے والے بونی وائرس کی وجہ سے ظاہر ہوتی ہے۔ یہ بیماری شدید بخار، قے، اسہال اور کئی اعضا کے ناکارہ ہونے کا سبب بن سکتی ہے۔ سی سی ایچ ایف وائرس کے مریضوں میں شرح اموات 10 سے 30 فیصد کے درمیان بتائی گئی ہے۔
جاپان میں 2013 میں پہلی بار اس بیماری کی تصدیق کے بعد سے 600 سے زیادہ کیسوں کا اندراج کیا جا چکا ہے جن میں زیادہ تر کاتعلق مئی، واکایاما، اور شیمانے جیسے مغربی علاقوں سے ہے۔
جاپان کی ویٹرنری میڈیکل ایسوسی ایشن نے ایک الرٹ جاری کیا ہےجس میں ویٹرنری ڈاکٹروں کو جانوروں یا ان کی لاشوں کو سنبھالتے وقت حفاظتی سامان جیسے ماسک، دستانے اور حفاظتی چشمے پہننے کی ہدایت کی گئی ہے۔ مقامی حکام اس انفیکشن کےسبب کی تحقیقات کر رہے ہیں تاکہ یہ معلوم کیا جا سکے کہ آیا وائرس براہ راست بلی سے ویٹرنر کومنتقل ہوا ہے یا اس کی کوئی وجہ تھی۔
اگرچہ پالتو جانوروں سے 'سی سی ایچ ایف' کیس شاذ و نادر ہی دیکھنے میں آتے ہیں لیکن اس واقعے نے متاثرہ گھریلو جانوروں سے لاحق خطرات کے بارے میں نئے اندیشوں کو جنم دیا ہے۔ خاص طور پر موسم بہار اور خزاں کے درمیان، جب چچڑیوں اور جووں کی افزائش عروج پر ہوتی ہے، محتاظ رہنے کی تنبیہ کی گئی ہے۔
حکام عوام کو مشورہ دے رہے ہیں کہ وہ چچڑی سے بچاؤ کے لیے اسپرے استعمال کریں، گھاس والے علاقوں میں لمبی آستین والی قمیضوں کا اور شارٹس کی بجائے پتلونوں کا استعمال کریں۔ علاوہ ازیں بیمار یا آوارہ جانوروں کی دیکھ بھال کے وقت اضافی احتیاطی تدابیر اختیار کریں۔
