یوکرین کے وزیر دفاع رستم عمروف نےبتایا ہے کہ  اتوار کو سعودی عرب میں امریکی وفد کے ساتھ ہونے والی بات چیت "تعمیری اور بامعنی" تھی اور توانائی کے شعبے پر گفتگو پر مرکوز تھی۔

عمروف نے سوشل میڈیا پر ایک پوسٹ میں کہا، "ہم نے خاص طور پر توانائی کے شعبے سمیت اہم معاملات  پر بات چیت کی ہے ۔"

عمروف نے امریکی صدر ڈونلڈ ٹرمپ کی جانب سے روس کے ساتھ تین سالہ جنگ کے خاتمے کے لیے سفارتی کوششوں کا حصہ ہونے والے یوکرینی وفد کی قیادت کی۔

امریکی خصوصی ایلچی اسٹیو وٹکوف نے سعودی عرب میں یوکرین کی جنگ کے خاتمے کے لیے اہم مذاکرات سے پہلے اپنی امید کا اظہار کرتے ہوئے کہا کہ روسی صدر ولادیمیر پوتن اس تین سالہ تنازع کو ختم کرنا چاہتے ہیں۔

وٹکوف نے اتوار کو فاکس نیوز کو بتایا کہ "مجھے لگتا ہے کہ وہ امن  قائم کرنے کے خواہاں  ہیں۔"

امریکی وفد نے سعودی عرب میں یوکرینی حکام کے ساتھ یوکرین اور روس کے درمیان ممکنہ جزوی جنگ بندی پر بات چیت کی۔ امریکی اور روسی حکام پیر کو  ریاض میں بات چیت کریں گے۔

وٹکوف نے کہا، "مجھے لگتا ہے کہ آپ پیر کو سعودی عرب میں کچھ حقیقی پیش رفت دیکھیں گے، خاص طور پر جب یہ دونوں ممالک کے درمیان بحیرہ اسود میں جہازوں کی جنگ بندی سے متعلق ہے۔ اور اس سے آپ قدرتی طور پر مکمل جنگ بندی کی طرف بڑھیں گے۔"

پوتن نے گزشتہ ہفتے عارضی طور پر یوکرینی توانائی کی سہولیات پر حملے روکنے پر اتفاق کیا تھا لیکن انہوں نے مکمل 30 دن کی جنگ بندی کی حمایت کرنے سے انکار کر دیا، جسے ٹرمپ نے مستقل امن معاہدے کی طرف پہلا قدم قرار دیا تھا۔ یوکرین نے ٹرمپ کی 30 روزہ  تجویز قبول کر لی تھی۔