یورپی کونسل آئندہ دنوں میں ایک غیر معمولی اجلاس منعقد کرے گی تاکہ امریکی صدر ڈونلڈ ٹرمپ کے گرین لینڈ سے منسلک ٹیرف عائد کرنے کے منصوبے پر بات چیت کی جا سکے۔

 انتونیو کوسٹا نے اتوار کو ایکس پر پوسٹ کیا کہ حالیہ پیش رفت کی اہمیت کو مدنظر رکھتے ہوئے اور مزید ہم آہنگی کے لیے میں نے آئندہ دنوں میں یورپی کونسل کا ایک غیر معمولی اجلاس بلانے کا فیصلہ کیا ہے۔

انہوں نے کہا کہ یورپی یونین کے رکن ممالک نے مشاورت کے بعد اتحاد، بین الاقوامی قانون، علاقائی سالمیت اور قومی خودمختاری کے ساتھ ساتھ ڈنمارک اور گرین لینڈ کے ساتھ یکجہتی اور آرکٹک میں امن و سلامتی کے مشترکہ ٹرانس اٹلانٹک مفادات  کے لیے ہماری مضبوط وابستگی کی تصدیق ک ہے ی۔

کوسٹا نے مزید کہا کہ ارکان نے یہ بھی تصدیق کی کہ ٹیرف "ٹرانس اٹلانٹک تعلقات کو نقصان پہنچائیں گے اور یہ  یورپی یونین-امریکہ تجارتی معاہدے کے ساتھ مطابقت نہیں رکھتے، جبکہ وہ کسی بھی قسم کے جبر کے خلاف دفاع کرنے اور امریکہ کے ساتھ مشترکہ مفادات کے مسائل پر تعمیری تعلقات جاری رکھنے کے لیے تیار ہیں۔

 واضح رہے کہ  امریکی صدر ڈونلڈ ٹرمپ نے ہفتہ کو کہا کہ واشنگٹن یکم فروری سے ڈنمارک، ناروے، سویڈن، فرانس، جرمنی، برطانیہ، نیدرلینڈز اور فن لینڈ کی اشیاء پر 10 فیصد محصولات عائد کرے گا، جو جون میں 25 فیصد تک بڑھ جائے گا۔

یورپی رہنماؤں نے ٹیرف کے خطرے کو مسترد کیا اور ڈنمارک کے ساتھ یکجہتی کا اعادہ کیا۔

اتوار کو اِن آٹھ یورپی ممالک نے ایک مشترکہ بیان جاری کیا جس میں امریکی خطرے کی مذمت کی گئی اور آرکٹک سلامتی  اور قومی خودمختاری کے لیے اپنی وابستگی کا اعادہ کیا۔